在大大小小的活動中，除了主角外，少不免會看到司儀的身影，別人眼中靠把口就搵到食，但要站得住腳其實並不容易。80後的Yuki（ 黃銓玉）是一名全職司儀，在16年放棄薪高糧準的銀行工作，創立自己的司儀公司司博禮，對每場活動都做足事前功夫，憑着專業的態度及形象，得到不少客戶的喜愛。除了擔任司儀外，她更到不同的公司擔任說話技巧培訓導師，成功靠把口搵食。

Yuki是一名全職司儀及說話技巧培訓導師，專門提供司儀服務及說話技巧培訓。「我哋比較多做商務活動嘅司議；喺說話技巧課程方面，都係以公司客為主，當中會教導公眾演說嘅技巧，例如故事鋪排、節奏、層次等。除咗我係全職外，仲有兼職嘅團隊，各有20位司儀及20位導師，當中有律師、醫生及老師，令到我哋可以提供中、英、普通話嘅司儀外，連法文、韓文等語言都冇問題。」

今年29歲的Yuki，至今主持了超過500場大大小小的活動，與她合作的機構包括香港貿易發展局、中國移動、星展銀行及AIA等。現時司儀及說話技巧培訓課收費每小時約$1,000至$2,000，分別佔生意6及4成。

讀中學時，Yuki已對朗誦有興趣，奈何為了生活及符合家人的期望，她在香港科技大學選讀工商管理及市場營銷，11年畢業後投身銀行界，「去咗銀行做trainee，期間到新加坡參加演講及說話技巧嘅培訓，先知有演講培訓導師呢行。我讀中學時有參加開朗誦比賽，對上台講嘢相關嘅都有興趣，之後利用公餘時間讀演講及司儀課程，參加國際演講會，慢慢仲做埋兼職司儀。」

兼職司儀的工作讓Yuki找到新方向及樂趣，她漸漸想轉行，但家人的反對令她難以下定決心，「我有向屋企人探口風話想轉行做司儀，每次都反對。直到15年尾我喺銀行返工時，右眼突然望唔到嘢，我向上司請假睇醫生，佢話不如做埋手上啲嘢先去，當時我冇理佢，好委屈咁喊住去睇醫生。雖然最後冇乜事，但令我下定決心要轉行，我同屋企人講，畀兩年時間我，如果冇成績我就返去安安份份咁打工。」

雖然發展不是太順利，但Yuki決定堅持下去，認為這行需要用時間累積口碑，「客戶嚟搵我主持活動時，我會先了解觀眾多數係講乜嘢語言嘅人、係乜嘢活動，及想帶出乜嘢訊息。然後我先開始寫講稿，好似最近我要主持一個有關乳癌嘅醫學會議，要背熟好多醫科名詞，到時先有好嘅發揮。另外，做司儀時常要介紹來賓，我會提早去現場認人及做update，減少出錯嘅機會。因為你做得好，台下面嘅聽眾可能就係你下一單job嘅客戶，我嘅司儀及說話培訓工作，都係一單一單咁轉介返嚟。」